ອົງການສະຫະປະຊາຊາດ ປະຈຳ ສປປ ລາວ ສະເຫຼີມສະຫຼອງວັນ ສປຊ

ດ້ວຍເຕັກໂນໂລຢີທີ່ທັນສະໄໝ

ທີ່ນະຄອນຫຼວງວຽງຈັນ, 24 ຕຸລາ 2016

english button

ສປຊ ສະເຫຼີມສະຫຼອງ ຄົບຮອບ 71 ປີ ໃນມື້ນີ້ທີ່ນະຄອນຫຼວງວຽງຈັນໃນງານທີ່ມີມະຫາຊົນເຂົ້າຮ່ວມຢ່າງຫຼວງຫຼາຍ ເຊິ່ງເນັ້ນການເຊື່ອມໂຍງເຕັກໂນໂລຢີໃໝ່ກັບການພັດທະນາແບບຍືນຍົງ. 

 

Digital UN pic 1

ພະນະທ່ານ ກິແກ້ວ ຈັນທະບູຣີ, ຮອງລັດຖະມົນຕີກະຊວງແຜນການ ແລະ ການລົງທຶນ, ທ່ານນາງ ອາລຸນາ ຖາວອນສຸກ, ນັກຮ້ອງ ແລະ ນັກແຕ່ງເພງ, ແລະ ທ່ານນາງ ຄາຣິນາ ອິມໂມເນັນ, ຜູ່ປະສານງານອົງການສະຫະປະຊາຊາດ ປະຈຳ ສປປ ລາວ, ໃນງານດັ່ງກ່າວ. ຮູບພາບ: UN in Lao PDR / Somlith Khounpaseuth

 

ແມ່ຍິງທີ່ນຸ່ງສິ້ນໄໝສີຟ້າ, ສວມຫູຟັງ 360 ອົງສາ ເຊິ່ງມີໂລໂກ້ອົງການສະຫະປະຊາຊາດຕິດຢູ່ນີ້ແມ່ນຮູບພາບສັນຍາລັກຂອງງານສະເຫຼີມສະຫຼອງວັນ ສປຊ ໃນປີນີ້. ງານ ສປຊ ໃນຍຸກດິຈິຕໍ ສາມາດດຶງດູດແຂກເຂົ້າຮ່ວມສູງເຖິງ 300 ກວ່າທ່ານ ສູ່ເມເຈີ ແພລດຕິນຳ ຊີເນເພລກສ ຢູ່ທີ່ວຽງຈັນເຊັນເຕີ ໃນມື້ນີ້. ງານດັ່ງກ່າວປະກອບມີການວາງສະແດງເຕັກໂນໂລຢີສີຂຽວ, ສຳຜັດໄດ້ ແລະ ເຄື່ອນໄຫວໄດ້ງ່າຍ ເຊິ່ງນຳສະເໜີວຽກງານຫຼາຍດ້ານຂອງບັນດາອົງການຈັດຕັ້ງຂອງອົງການສະຫະປະຊາຊາດ ທີ່ກ່ຽວຂ້ອງກັບການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງໃນ ສປປ ລາວ.

ປີກາຍນີ້, ລັດຖະບານແຫ່ງ ສປປ ລາວ ພ້ອມກັບປະເທດສະມາຊິກຂອງອົງການສະຫະປະຊາຊາດ 192 ປະເທດ ໄດ້ຮັບຮອງເອົາ 17 ເປົ້າໝາຍການພັດທະນາແບບຍືນຍົງຂອງສາກົນ. ເປົ້າໝາຍສາກົນເຫຼົ່ານີ້ ແມ່ນຮຽກຮ້ອງໃຫ້ສາກົນຮ່ວມກັນ ເພື່ອລຶບລ້າງຄວາມທຸກຍາກ,​ ປົກປ້ອງໂລກ ແລະ ຮັບປະກັນວ່າ ໝົດທຸກຄົນຈະມີສັນຕິພາບ ແລະ ຄວາມຈະເລີນຮຸ່ງເຮືອງ. ເປົ້າໝາຍດັ່ງກ່າວມີຈຸດປະສົງຫັນໂລກເຂົ້າສູ່ການພັດທະນາແບບຍືນຍົງ ເຊິ່ງຈະຕ້ອງເຮັດໃຫ້ສຳເລັດພາຍໃນປີ 2030. ສປປ ລາວ ໄດ້ຫັນເປົ້າໝາຍດັ່ງກ່າວເຂົ້າສູ່ຍຸດທະສາດ ແລະ ແຜນການແຫ່ງຊາດ ເປັນທີ່ຮຽບຮ້ອຍແລ້ວ, ແລະ ເລີ່ມເປີດນໍາໃຊ້ເປົ້າໝາຍການພັດທະນາແບບຍືນຍົງແຫ່ງຊາດຂອງຕົນ ຄື ເປົ້າໝາຍທີ 18 “ຊີວິດທີ່ປອດໄພຈາກລະເບີດບໍ່ທັນແຕກໃນໄລຍະກອງປະຊຸມສຸດຍອດອາຊຽນໃນເດືອນກັນຍາທີ່ຜ່ານມານີ້ ໂດຍການເຂົ້າຮ່ວມຂອງທ່ານ ບັນຄີມູນ, ເລຂາທິການໃຫຍ່ອົງການ ສປຊ.

 

VR film

 ໄວໜຸ່ມລາວເບິ່ງວິດີໂອ 360 ອົງສາ ກ່ຽວກັບລະເບີດບໍ່ທັນແຕກ. ຮູບພາບ: UN in Lao PDR / Somlith Khounpaseuth

 

ແຂກທີ່ໄດ້ເຂົ້າຮ່ວມງານໃນມື້ນີ້ ໄດ້ຮຽນຮູ້ເພີ່ມຕື່ມກ່ຽວກັບເປົ້າໝາຍການພັດທະນາແບບຍືນຍົງໂດຍຜ່ານບູດກິດຈະກຳຕ່າງໆທັງໝົດ 8 ແຫ່ງ. ແຂກດັ່ງກ່າວໄດ້ມີໂອກາດສຳຜັດປະສົບການຕົວຈິງກັບວິດີໂອ 360 ອົງສາ ທີ່ຜະລິດຂຶ້ນຄັ້ງທຳອິດເພື່ອຜູ່ຊົມຊາວລາວ ເຊິ່ງຈະໄດ້ຮຽນຮູ້ຢ່າງເລິກເຊິ່ງກ່ຽວກັບການເຮັດວຽກຕົວຈິງຂອງທີມງານເກັບກູ້ລະເບີດບໍ່ທັນແຕກ. ນອກຈາກນັ້ນ, ກໍໄດ້ສຳຜັດກັບແອັບຕ່າງໆທີ່ຜະລິດໂດຍ ສປຊ ຜ່ານທາງໂທລະສັບມືຖືຂອງຫົວເວີຍ, ໄດ້ພົບກັບ ນາງ ນ້ອຍ ສາວນ້ອຍທີ່ເປັນຕົວແທນໃຫ້ແກ່ໄວໜຸ່ມຍິງ ຂອງ ສປປ ລາວໃນຮູບແບບກະຕູນ, ໄດ້ເຂົ້າຊົມປ່າໄມ້ທີ່ຢູ່ພາກໃຕ້ຂອງ ສປປ ລາວ ໃນບູດຊີວະນາໆພັນ ຜ່ານຮູບ 360 ອົງສາ, ໄດ້ສຳຜັດກັບວຽກງານຂອງ ອາສາສະໝັກອອນລາຍຂອງອົງການສະຫະປະຊາຊາດ, ເບິ່ງຮູບພາບທີ່ສວຍງາມຈາກວິດີໂອ ບິນສູງເບິ່ງເມືອງລາວ ໂດຍການຖ່າຍພາບທາງອາກາດຈາກເຄື່ອງໂດຣນ ແລະ ສຳຜັດກັບການບໍລິການຊຸມຊົນດ້ວຍນະວັດຕະກຳໃໝ່. ບູດກິດຈະກຳຕ່າງໆເຫຼົ່ານີ້ ຈະມີພະນັກງານຂອງບັນດາອົງການຈັດຕັ້ງຂອງອົງການສະຫະປະຊາຊາດ ທີ່ເຮັດວຽກຢູ່ ສປປ ລາວ ປະຈຳຢູ່ ນັບແຕ່ອົງການ UNESCO ຈົນຮອດ WHO.

ປະສົບການຕ່າງໆເຫຼົ່ານີ້ ມີຈຸດປະສົງນຳສະເໜີການເຮັດວຽກຂອງ ສປຊ ໃນການສະໜັບສະໜຸນການຈັດຕັ້ງປະຕິບັດເປົ້າໝາຍການພັດທະນາແຫ່ງຊາດຂອງລັດຖະບານ ດ້ວຍວິທີການແບບມີສ່ວນຮ່ວມ, ຕອບຄຳຖາມທີ່ວ່າ ເຕັກໂນໂລຢີນຳເອົາຜົນປະໂຫຍດມາສູ່ປະຊາຊົນ ແລະ ເຮັດວຽກເພື່ອລຶບລ້າງຄວາມທຸກຍາກແນວໃດ.

ໃນການກ່າວເປີດງານ, ທ່ານນາງ ຄາຣິນາ ອິມໂມເນັນ,​ ຜູ້ປະສານງານອົງການສະຫະປະຊາຊາດ ປະຈຳ ສປປ ລາວ ໄດ້ກ່າວວ່າ: ເຕັກໂນໂລຢີໃໝ່ກຳລັງຂັບເຄື່ອນການປ່ຽນແປງຂອງໂລກຢ່າງໄວວາ. ອົງການສະຫະປະຊາຊາດ ຕ້ອງການໃຊ້ເຕັກໂນໂລຢີທີ່ທັນສະໄໝ ເພື່ອຊ່ວຍບັນລຸເປົ້າໝາຍການພັດທະນາແບບຍືນຍົງຂອງສາກົນ, ນຳເອົາຜົນປະໂຫຍດມາສູ່ໝົດທຸກຄົນ ໂດຍບໍ່ປະຖິ້ມໃຜໄວ້ຂ້າງຫຼັງ,”. ໃນຊ່ວງພາກສ່ວນທຳອິດຂອງງານ, ຜູ່ເຂົ້າຮ່ວມໄດ້ມີໂອກາດໄດ້ຮັບຊົມວິດີໂອທີ່ກ່ຽວກັບການເຮັດວຽກຂອງ ສປຊ ທີ່ສ່ອງແສງເຖິງຜົນປະໂຫຍດຂອງເຕັກໂນໂລຢີ ທີ່ມີຕໍ່ຊຸມຊົນຕ່າງໆໃນ ສປປ ລາວ. ນອກຈາກນັ້ນ, ບັນດາແຂກຖືກເຊີນກໍຍັງໄດ້ຮັບຊົມວິດີໂອຫຍໍ້ທີ່ຜະລິດໂດຍ ສປຊ ເພື່ອຜູ່ຊົມທົ່ວໂລກ ເພື່ອເຜີຍແຜ່ບັນຫາໃຫຍ່ຂອງໂລກ ເຊັ່ນ: ການຮັບມືກັບການປ່ຽນແປງຂອງດິນຟ້າອາກາດ ໂດຍການປຸກລະດົມຂອງແອງກຣີ້ເບີດ.

ພ້ອມດຽວກັນນັ້ນ, ໃນງານດັ່ງກ່າວຍັງຮັບກຽດເຂົ້າຮ່ວມໂດຍທ່ານ ອາລຸນແກ້ວ ກິດຕິຄຸນ, ລັດຖະມົນຕີປະຈຳສຳນັກງານນາຍົກລັດຖະມົນຕີ, ແລະ ເຈົ້າໜ້າທີ່ຂັ້ນສູງຂອງລັດຖະບານ ແລະ ນັກການທູດ.

ຂໍ້ມູນເພີ່ມຕື່ມ, ກະລຸນາຕິດຕໍ່:

ທ່ານນາງ ອິດິໂກ ຮາໂມສ-ໂຊໂລ

ຊ່ຽວຊານການສື່ສານ, ອົງການ ສປຊ ປະຈຳ ສປປ ລາວ

This email address is being protected from spambots. You need JavaScript enabled to view it.

ໂທ.: 021 267 778

ມືຖື: 020 7717 7913

Sustainable Development Goals

E SDG Poster Tabloid

Look at our Exposure photo stories

Exposure screenshot

60 years of Lao - UN partnership

Promo shot 1