english button

ໄວໜຸ່ມລາວເຖິງດວງດາວ 

ນະຄອນຫຼວງວຽງຈັນ, 26 ກັນຍາ 2017

ການຕາມຫາຄວາມຝັນໃນຊີວິດຂອງທ່ານ ແມ່ນໄດ້ໃຊ້ຄວາມກ້າຫານ ແລະ ຄວາມພຽນພະຍາຍາມ. ຄວາມກ້າຫານທີ່ຈະສະແດງຄວາມປາດຖະໜາໃນຫົວໃຈຂອງທ່ານອອກມາ, ຄົ້ນຫາທາງກ້າວໄປຂ້າງໜ້າ, ຊອກຫາຍຸດທະສາດທີ່ຈະເຮັດໃຫ້ບັນລຸເປົ້າໝາຍ ບໍ່ວ່າຈະມີຫຍັງເກີດຂຶ້ນກໍ່ຕາມ. ຄວາມພຽນພະຍາຍາມທີ່ຈະສືບຕໍ່, ບໍ່ຍອມອອກຈາກຈຸດມຸ້ງໝາຍ, ລະຖິ້ມຄວາມສົງໄສ ແລະ ປະເຊີນໜ້າກັບອຸປະສັກທີ່ເກີດຂຶ້ນ– ຈົນຮອດມື້ທີ່ຄວາມຝັນຂອງທ່ານກາຍເປັນຈິງ.  

 

ໄວໜຸ່ມລາວທີ່ປະສົບຜົນສຳເລັດໃນຊີວິດ ລວມເຖິງຜູ້ທີ່ຍັງໄຝ່ຫາຄວາມສຳເລັດໃນຊີວິດ ໄດ້ເຕົ້າໂຮມກັນຢູ່ທີ່ ນະຄອນຫຼວງວຽງຈັນ ໃນຄ່ຳຄືນແຫ່ງການສ້າງແຮງບັນດານໃຈ ເພື່ອສົນທະນາກ່ຽວກັບການມີເປົ້າໝາຍແມ່ນຫຍັງ ແລະ ອັນໃດທີ່ຈະນຳພາໄປສູ່ຄວາມສຳເລັດ. ຫົວຂໍ້ຂອງງານແມ່ນ “ສຸມໃສ່ອະນາຄົດ: ເປົ້າໝາຍຂອງທ່ານແມ່ນຫຍັງ?” ເຊິ່ງງານນີ້ ໄດ້ເປີດໂອກາດໃຫ້ໄວໜຸ່ມລາວໄດ້ພົບພໍ້ຕົວຈິງກັບບຸກຄົນຕົ້ນແບບຂອງເຂົາເຈົ້າ ທີ່ຮັກຄວາມເປັນລາວ ທີ່ມາຈາກຫຼາຍຂະແໜງການ ທີ່ປະສົບຜົນສຳເລັດໃນການຕາມຫາຄວາມຝັນຂອງບຸກຄົນຕົ້ນແບບເຫຼົ່ານັ້ນ ແລະ ໄວໜຸ່ມລາວຍັງໄດ້ຮັບຟັງເລື່ອງລາວທີ່ໜ້າສົນໃຈກ່ຽວກັບບາດກ້າວສູ່ຄວາມສຳເລັດນຳອີກ. ງານດັ່ງກ່າວນີ້ ມີຜູ້ເຂົ້າຮ່ວມ 150 ກວ່າທ່ານ. 

 

UNDP Social Good Summit

ພາບໂດຍ: ອົງການສະຫະປະຊາຊາດ ເພື່ອການພັດທະນາ ປະຈຳ ສປປ ລາວ / ໂຢນ້າສ ແອທເນີ

 

ການສົນທະນາແມ່ນຖືກຈັດຂຶ້ນຫຼັງຈາກການເປີດໂຕຮູບເງົາເລື່ອງໃໝ່ຂອງອົງການສະຫະປະຊາຊາດ ປະຈຳ ສປປ ລາວ ທີ່ມີຊື່ວ່າ “ນີ້ແມ່ນການພັດທະນາ: ເປົ້າໝາຍການພັດທະນາແບບຍືນຍົງ ໃນ ສປປ ລາວ”. ຮູບເງົາເລື່ອງດັ່ງກ່າວ ສະແດງເຖິງຄວາມມຸ່ງໝັ້ນຂອງປະຊາຊົນລາວ ຕໍ່ກັບວິໄສທັດເພື່ອອະນາຄົດທີ່ຍືນຍົງຄືແນວໃດ ແລະ ສະແດງເຖິງບົດບາດຂອງແຕ່ລະຄົນໃນການສ້າງບ້ານ, ເມືອງ ແລະ ປະເທດໃຫ້ກາຍເປັນບ່ອນທີ່ດີກວ່າ. 

ເປົ້າໝາຍການພັດທະນາແບບຍືນຍົງ ແມ່ນເປົ້າໝາຍທີ່ຮຽກຮ້ອງໃຫ້ທຸກປະເທດໃນໂລກ ລຶບລ້າງຄວາມທຸກຍາກ, ປົກປ້ອງໂລກຂອງພວກເຮົາ ແລະ ຮັບປະກັນວ່າ ໝົດທຸກຄົນ ມີຄວາມສະຫງົບສຸກ ແລະ ຄວາມຈະເລີນຮຸ່ງເຮືອງ ພາຍໃນປີ 2030. 

ນ. ດາວມະຍຸລີ ຈັນທິລາດ ຫຼື ດີ້ ສາວລາວ, ແຊັມຕີມວຍ ອາຍຸ 18 ປີ ແລະ ຕົວລະຄອນເອກຂອງຮູບເງົາ ໄດ້ກ່າວວ່າ “ຂ້າພະເຈົ້າເປັນນັກມວຍ ຍ້ອນວ່າ ຂ້າພະເຈົ້າຢາກເປັນບຸກຄົນຕົ້ນແບບແກ່ຜູ້ອື່ນ ແລະ ສ້າງແຮງບັນດານໃຈແກ່ຜູ້ອື່ນ ໃນການຕາມຫາຄວາມຝັນຂອງເຂົາເຈົ້າ”. 

ນອກນັ້ນ, ຍັງມີຜູ້ຮ່ວມສົນທະນາອື່ນໆອີກ ເຊັ່ນ: ນ. ເສີດ ມະນິນຕາ, ໂຄສົກວິທະຍຸຊຸມຊົມ ຈາກຊົນເຜົ່າຕະໂອ້ຍ  ຢູ່ເມືອງທ່າແຕງ, ແຂວງເຊກອງ. ສະຖານີວິທະຍຸຊຸມຊົນ ຢູ່ 6 ແຂວງ ໃນ ສປປ ລາວ ທີ່ໄດ້ຮັບການສະໜັບສະໜຸນໂດຍ ອົງການສະຫະປະຊາຊາດ ເພື່ອການພັດທະນາ (UNDP) ໄດ້ອອກອາກາດເປັນພາສາຊົນເຜົ່າເຖິງ 8 ພາສາ ເຊິ່ງແບ່ງປັນຂໍ້ມູນຂ່າວສານກັບປະຊາຊົນໃນເຂດຫ່າງໄກສອກຫຼີກຂອງປະເທດ. ສະຖານີໂດຍທັງໝົດ ແມ່ນດຳເນີນໂດຍອາສາສະໝັກຈາກຊຸມຊົນ ເຊິ່ງເປັນກຸ່ມທີ່ມີແຮງບັນດານໃຈ ທີ່ສ່ວນຫຼາຍເປັນໄວໜຸ່ມ ທີ່ຢາກຮຽນຮູ້ ແລະ ປະກອບສ່ວນດ້ານເວລາ ແລະ ເຫື່ອແຮງເພື່ອສັງຄົມ. ເສີດເອງ ແມ່ນໄດ້ດຳເນີນລາຍການເປັນພາສາລາວ ແລະ ພາສາຕະໂອ້ຍ. 

 

ພາບໂດຍ: ອົງການສະຫະປະຊາຊາດ ປະຈຳ ສປປ ລາວ / ອິດິໂກ ຮາໂມສ-ໂຊໂລ

 

ທ. ເອກກະສິດ ສິລິຈັກ, ນັກຂຽນ ອາຍຸ 23 ປີ ເຊິ່ງເປັນເຈົ້າຂອງໜັງສືຂາຍດີ ‘ຄິດແບບນັກທຸລະກິດ’ ໄດ້ເລີ່ມສ້າງລາຍໄດ້ຈາກການຫຼິ້ນຫຸ້ນ ແລະ ໄດ້ຮັບຮູ້ວ່າ ຕົນເອງມີໜ້າທີ່ສອນໄວໜຸ່ມລາວໃນການລົງທຶນຢ່າງມີໄຫວພິບ, ສິ່ງສຳຄັນທີ່ສຸດ ແມ່ນການເຊື່ອໝັ້ນຕົນເອງ ແລະ ຮູ້ຄວາມຝັນຂອງຕົນເອງແທ້ໆ. 

ນ. ອາເລັກຊານດຣາ ບຸນຊ່ວຍ, ນັກຮ້ອງເພງປັອບ ແລະ ທູດສັນທະວະໄມຕີຂອງອົງການ UNDP ປະຈຳ ສປປ ລາວ,  ໄດ້ບອກຄວາມເຄັດລັບໃນການຮັກສາແຮງບັນດານໃຈ ເຖິງຈະພົບຄວາມລົ້ມເຫລວ ນັ້ນກໍ່ຄື: ວິໄນ. ຄອບຄົວຂອງຊານດຣາທີ່ເປັນຄອບຄົວນັກດົນຕີ ໄດ້ຊ່ວຍໃຫ້ຊານດຣາ ຈົດຈໍ່ໃສ່ການຝຶກຝົນຫຼິ້ນເຄື່ອງດົນຕີໃນແຕ່ລະມື້ ເຊິ່ງເປັນສິ່ງທີ່ນຳພາຊານດຣາໄປສູ່ຄວາມສຳເລັດ. 

ທ. ຄັດຖະພອນ ຕະມອງຊູມ່ວງໄຊ, ໜຶ່ງໃນທີມງານຈາກ ສປປ ລາວ ທີ່ໄດ້ເຂົ້າຮ່ວມການແຂ່ງຂັນຫຸ່ນຍົນຢູ່ ສະຫະລັດອາເມລິກາ ເຊິ່ງຜົນການແຂ່ງຂັນແມ່ນ ສປປ ລາວ ເຮົາໄດ້ທີ 28 ຈາກ 157 ປະເທດທີ່ເຂົ້າຮ່ວມການແຂ່ງຂັນ. ຄັດຖະພອນ ເຊື່ອວ່າ ການຊອກຫາເປົ້າໝາຍໃນຊີວິດຂອງພວກເຮົາ ແມ່ນອຸປະສັກທຳອິດສູ່ຄວາມສຳເລັດ. ເມື່ອເຮົາຮູ້ວ່າ ເຮົາຕ້ອງການຫຍັງ, ການເຮັດວຽກໜັກ, ການຈົດຈໍ່ໃສ່ເປົ້າໝາຍ ແລະ ການຮຽນຮູ້ເລື້ອຍໆ ຈະເປັນເສັ້ນທາງສູ່ຄວາມຝັນຂອງພວກເຮົາ. 

ທ. ຊານວ່າ ແຊ່ພານ, ຜູ້ກໍ່ຕັ້ງ ສູນພາສາ ຢ້າວນ້ອຍ ໄດ້ກ່າວວ່າ “ຕ້ອງໃຊ້ຄວາມກ້າໃນການທີ່ຈະໄປເຖິງເປົ້າໝາຍຂອງທ່ານ“ ແລະ ຍັງກ່າວຕື່ມວ່າ, “ຂ້າພະເຈົ້າຕ້ອງອອກຈາກບ້ານເກີດຂອງຂ້າພະເຈົ້າຢູ່ແຂວງບໍ່ແກ້ວ ເພາະຂ້າພະເຈົ້າຮູ້ວ່າ ຂ້າພະເຈົ້າຢາກມີຊີວິດທີ່ຕ່າງຈາກໝູ່ຂອງຂ້າພະເຈົ້າ ທີ່ກາຍເປັນຜູ້ຖືກເຄາະຮ້າຍຈາກຢາເສບຕິດ. ປະຈຸບັນນີ້ ຂ້າພະເຈົ້າພູມໃຈໃນສູນຂອງຂ້າພະເຈົ້າ ແລະ ໜັງສືທີ່ຂ້າພະເຈົ້າໄດ້ຈັດພິມ”. 

ໂດຍການຮັບຟັງເລື່ອງລາວ ຂອງໄວໜຸ່ມຜູ້ທີ່ປະສົບຜົນສຳເລັດທັງຍິງ ແລະ ຊາຍວ່າ ເຂົາເຈົ້າເລີ່ມຮູ້ສຶກມີພອນສະຫວັນ ແລະ ເລີ່ມມຸ້ງໝັ້ນເພື່ອຄວາມເປັນເລີດໄດ້ແນວໃດ, ຜູ້ຟັງຜູ້ຊົມທີ່ເປັນໄວໜຸ່ມຈະໄດ້ຮັບການກະຕຸ້ນໃຫ້ຄິດຫາວິທີທາງຂອງຕົນເອງ ເພື່ອສ້າງຄວາມແຕກຕ່າງ ແລະ ສ້າງອະນາຄົດທີ່ຍືນຍົງສຳລັບເຂົາເຈົ້າເອງ ແລະ ຊຸມຊົນຂອງເຂົາເຈົ້າ.  

ພາບໂດຍ: ອົງການສະຫະປະຊາຊາດ ປະຈຳ ສປປ ລາວ / ອິດິໂກ ຮາໂມສ-ໂຊໂລ

 

ທ. ຊານວ່າ ແຊ່ພານ ໄດ້ກ່າວສະຫຼຸບໃນງານວ່າ “ຄວາມຝັນຈະເປັນຈິງໄດ້ ກໍ່ຕໍ່ເມື່ອທ່ານບໍ່ພຽງແຕ່ເວົ້າ ແຕ່ຕ້ອງເຮັດພ້ອມ. ຂໍໃຫ້ນີ້ເປັນສິ່ງທຳອິດທີ່ທ່ານຕ້ອງເຮັດ ໃນເສັ້ນທາງສູ່ຄວາມສຳເລັດຂອງທ່ານ ”. 

ງານດັ່ງກ່າວນີ້ ໄດ້ເປີດໂອກາດໃຫ້ໄວໜຸ່ມໄດ້ຕັ້ງຄຳຖາມ ແລະ ທົບທວນຄວາມຝັນຂອງຕົນເອງ ແລະ ກ່າວອອກມາໃຫ້ຜູ້ເຂົ້າຮ່ວມງານໄດ້ຮັບຮູ້. ໜຶ່ງໃນຜູ້ເຂົ້າຮ່ວມຈາກສູນກາງຊາວໜຸ່ມ, ທ່ານ ຂັນໄຊ ວັນທະວົງ, ໄດ້ກ່າວຄຳເວົ້າທີ່ໃຫ້ພະລັງແກ່ໝົດທຸກຄົນວ່າ: “ຄວາມຝັນຂອງຂ້າພະເຈົ້າຄື ປະເທດຊາດມີຄວາມຈະເລີນຮຸ່ງເຮືອງ ແລະ ປະຊາຊົນທຸກຄົນໄດ້ຮັບການສຶກສາ. ຂ້າພະເຈົ້າຢາກໃຫ້ຄົນລາວທຸກຄົນໄດ້ເຂົ້າເຖິງການສຶກສາທີ່ມີຄຸນນະພາບ ແລະ ຮູ້ຄວາມສາມາດຂອງເຂົາເຈົ້າເອງ. ຂ້າພະເຈົ້າບໍ່ພຽງແຕ່ຝັນງຽບໆ ແຕ່ຍັງເຮັດວຽກເພື່ອຄວາມຝັນນັ້ນອີກ: ຂ້າພະເຈົ້າວາງແຜນທີ່ຈະເປີດສູນການສຶກສາສຳລັບໄວໜຸ່ມ ແລະ ຂ້າພະເຈົ້າກໍຂໍຮຽກຮ້ອງໃຫ້ທຸກທ່ານຮ່ວມສ້າງອະນາຄົດທີ່ຍືນຍົງຂອງ ສປປ ລາວ ຮ່ວມກັນ”. 

ຂໍ້ມູນເພີ່ມຕື່ມ:

• ເບິ່ງຮູບເງົາ “ນີ້ແມ່ນການພັດທະນາ: ເປົ້າໝາຍການພັດທະນາແບບຍືນຍົງ ໃນ ສປປ ລາວ” ທີ່: https://www.youtube.com/watch?v=1zYgjUVs200&t= 

• ໂຄງການວິທະຍຸຊຸມຊົນທີ່ສະໜັບສະໜຸນໂດຍອົງການ: http://www.la.undp.org/content/lao_pdr/en/home/operations/projects/democratic_governance/CPCSP/  

 

ຕິດຕໍ່ຂໍ້ມູນເພີ່ມຕື່ມ:

ທ່ານນາງ. ອິດິໂກ ຮາໂມສ-ໂຊໂລ 

ຊ່ຽວຊານການສື່ສານ, ອົງການ ສປຊ ປະຈຳ ສປປ ລາວ 

This email address is being protected from spambots. You need JavaScript enabled to view it.

ໂທ.: 021 267 778

ມືຖື: 020 7717 7913

 

 

 

 

Sustainable Development Goals

E SDG Poster Tabloid resized

Look at our Exposure photo stories

Exposure screenshot resized

Watch the new film by UN in Lao PDR, 'This is Development'

SDG film thumbs

60 years of Lao - UN partnership

Promo shot 1 resized