ປັບປ່ຽນພຶດຕິກຳພຽງເລັກນ້ອຍ ເພື່ອອະນາຄົດຂອງໂລກທີ່ສົດໃສ

ເພື່ອສະເຫຼີມສະຫຼອງວັນສະຫະປະຊາຊາດ ປະຈຳປີ 2018, ອົງການສະຫະປະຊາຊາດ ປະຈຳ ສປປ ລາວ ແລະ ສູນກາງຊາວໜຸ່ມ ປະຊາຊົນ ປະຕິວັດລາວ ໄດ້ຮ່ວມກັນເປັນເຈົ້າພາບຈັດງານສຳລັບໄວໜຸ່ມລາວຂຶ້ນ ກ່ຽວກັບການ

english button

ໃຊ້ຊີວິດເພື່ອໃຫ້ມີສຸຂະພາບທີ່ດີ ແລະ ມີຄວາມຮັບຜິດຊອບຕໍ່ສິ່ງແວດລ້ອມ


ນະຄອນຫຼວງວຽງຈັນ, 19 ຕຸລາ 2018 - “ບາງຄັ້ງກໍເຂົ້າໃຈຍາກກັບຄວາມຄິດທີ່ວ່າ ການຕັດສິນໃຈໃນເລື່ອງນ້ອຍໆໃນຊີວິດປະຈຳວັນຂອງພວກເຮົາ ສົ່ງຜົນກະທົບຕໍ່ເລື່ອງໃຫຍ່ຂອງປະເທດ ແລະ ໂລກທີ່ພວກເຮົາອາໄສຢູ່,” ກ່າວໂດຍ ນ້ອງ ຈັນສະໄໝ ພົມມະຈັນ, ນັກສຶກສາຄົນໜຶ່ງຈາກນະຄອນຫລວງວຽງຈັນທີ່ຈະໄປຮຽນຕໍ່ປະລິນຍາໂທຢູ່ປະເທດນິວຊີແລນໃນໝໍ່ໆນີ້. ນ້ອງ ຈັນສະໄໝ ເປັນໜຶ່ງໃນໄວໜຸ່ມຈຳນວນຫຼາຍກວ່າ 300 ຄົນ ທີ່ໄດ້ເຂົ້າຮ່ວມງານສະເຫຼີມສະຫຼອງວັນສະຫະປະຊາຊາດ ທີ່ສູນກາງຊາວໜຸ່ມ ປະຊາຊົນ ປະຕິວັດລາວ ພາຍໃຕ້ຄຳຂວັນ “ທາງເລືອກຂອງຂ້ອຍ ຄືອະນາຄົດຂອງພວກເຮົາ”.

ການສະເຫຼີມສະຫຼອງວັນສະຫະປະຊາຊາດ ໄດ້ຮັບການຈັດຂຶ້ນທຸກໆປີ ໃນໄລຍະສັບປະດາສະຫະປະຊາຊາດ ໃນເດືອນຕຸລາ ເພື່ອສົ່ງເສີມເປົ້າໝາຍ, ຄ່ານິຍົມ ແລະ ຜົນສຳເລັດຂອງອົງການສະຫະປະຊາຊາດ ໃນທົ່ວໂລກ. ປີນີ້, ອົງການສະຫະປະຊາດ ກໍຄົບຮອບ 73 ປີ.

IMG 5388 opt

 ທ່ານ ນ. ຄາຣິນາ ອິມໂມເນັນ, ຜູ້ປະສານອົງການສະຫະປະຊາຊາດ ປະຈຳ ສປປ ລາວ (ຊ້າຍ), ທ່ານ ອາລຸນໄຊ ສຸນນະລາດ, ກຳມະການສູນກາງສຳຮອງ, ເລຂາຄະນະບໍລິຫານງານສູນກາງຊາວໜຸ່ມ ປະຊາຊົນ ປະຕິວັດລາວ (ກາງ), ທ່ານ ນ. ຄຳເພົາ ເອີນທະວັນ, ຮອງລັດຖະມົນຕີກະຊວງການຕ່າງປະເທດ (ຂວາ) ກ່າວເປີດພິທີ. ຮູບພາບ: UN Lao PDR

ຈຸດປະສົງຂອງງານ “ທາງເລືອກຂອງຂ້ອຍ ຄືອະນາຄົດຂອງພວກເຮົາ” ໃນປີນີ້ ກໍເພື່ອປຸກລະດົມໄວໜຸ່ມຄຳນຶງເຖິງທາງເລືອກຂອງພວກເຂົາໃນແຕ່ລະມື້, ເຊັ່ນ ການນໍາໃຊ້ພລາສຕິກ, ໂພຊະນາການເພື່ອສຸຂະພາບ ແລະ ການນໍາໃຊ້ພະລັງງານ ແລະ ຊັບພະຍາກອນທຳມະຊາດ. ໃນເວທີສົນທະນາຊຶ່ງມີນຳພາການສົນທະນາໂດຍໂຄສົກວິທະຍຸຈາກສູນກາງຊາວໜຸ່ມ, ບັນດາຊ່ຽວຊານຈາກບັນດາເຄືອຂ່າຍອົງການສະຫະປະຊາຊາດ ແລະ ລັດຖະບານ ໄດ້ແລກປ່ຽນຂໍ້ມູນກ່ຽວກັບຫຼາຍບັນຫາ ເຊັ່ນ ການປ່ຽນແປງດິນຟ້າອາກາດ, ການອະນຸລັກສິ່ງແວດລ້ອມ, ການບໍລິໂພກຢ່າງມີຄວາມຮັບຜິດຊອບ ແລະ ອາຫານເພື່ອສຸຂະພາບ. ນອກຈາກນີ້, ບັນດາແຂກທີ່ໄດ້ເຂົ້າຮ່ວມງານ ກໍຍັງໄດ້ມ່ວນຊື່ນກັບການແຂ່ງຂັນແຕ່ງກິນ ທີ່ຈັດໂດຍອົງການອາຫານໂລກ ແລະ ການສະແດງຈາກສູນກາງຊາວໜຸ່ມ ແລະ ກຸ່ມນັກເຕັ້ນຟັ່ງລາວ.

ນອກຈາກງານດັ່ງກ່າວແລ້ວ, ອົງການສະຫະປະຊາຊາດ ປະຈຳ ສປປ ລາວ ກໍຍັງໄດ້ສົ່ງເສີມໄວໜຸ່ມໃຫ້ປ່ຽນແປງຮູບແບບການດຳລົງຊີວິດ ເພື່ອໃຫ້ມີສຸຂະພາບທີ່ດີ ແລະ ມີຄວາມຮັບຜິດຊອບຕໍ່ສິ່ງແວດລ້ອມ ໃນອາທິດຜ່ານໆມາ ໂດຍໃຫ້ພວກເຂົາສົ່ງຮູບຖ່າຍຮູບຕົນເອງ (ເຊວຟີ້) ຜ່ານທາງໂລກອອນລາຍ ກ່ຽວກັບກິດຈະກຳທີ່ບົ່ງບອກເຖິງການຮັບມືກັບການປ່ຽນແປງດິນຟ້າອາກາດ, ການແກ້ໄຂບັນຫາມົນລະພິດພລາສຕິກ ແລະ ການກິນອາຫານເພື່ອສຸຂະພາບ. ອົງການສະຫະປະຊາຊາດ ກອງທຶນສຳລັບເດັກ ແລະ ອົງການອະນາໄມໂລກ ໄດ້ຮ່ວມມືກັນຜະລິດລາຍການວິທະຍຸ ນຳໂດຍໄວໜຸ່ມລາວກ່ຽວກັບຫົວຂໍ້ທີ່ຄ້າຍຄືກັນນີ້ ເພື່ອອອກອາກາດໃນອາທິດຕໍ່ໆໄປ.

IMG 5643 opt

ຜູ້ເຂົ້າຮ່ວມການແຂ່ງຂັນແຕ່ງກິນນຳສະເໜີອາຫານຂອງຕົນເອງ. ຮູບພາບ: UN Lao PDR

ໃນການກ່າວມີຄຳເຫັນເປີດງານ, ທ່ານ ນ. ຄາຣິນາ ອິມໂມເນັນ, ຜູ້ປະສານອົງການສະຫະປະຊາຊາດ ປະຈຳ ສປປ ລາວ, ໄດ້ເນັ້ນຄວາມສໍາຄັນຂອງໄວໜຸ່ມຕໍ່ກັບຜົນສໍາເລັດຂອງເປົ້າໝາຍການພັດທະນາແບບຍືນຍົນ ແລະ ສະໜັບສະໜຸນໃຫ້ໄວໜຸ່ມລາວຄຳນຶງເຖິງຜົນກະທົບຈາກການກະທຳຂອງຕົນເອງຕໍ່ກັບສິ່ງແວດລ້ອມ, ສຸຂະພາບ ແລະ ເພື່ອນຮ່ວມຊາດ. ທ່ານໄດ້ກ່າວວ່າ “ການກະທຳຂອງພວກເຮົາມີຄວາມໝາຍ. ໂດຍຜ່ານການກະທຳຂອງພວກເຮົາ, ພວກເຮົາຈະເປັນຜູ້ທີ່ມີບົດບາດສຳຄັນໃນການປ່ຽນແປງໂລກໃຫ້ດີຂຶ້ນໄດ້”.

ທ່ານຮອງລັດຖະມົນຕີກະຊວງການຕ່າງປະເທດ, ທ່ານ ນ. ຄຳເພົາ ເອີນທະວັນ, ແລະ ທ່ານ ອາລຸນໄຊ ສຸນນະລາດ, ກຳມະການສູນກາງສຳຮອງ, ເລຂາຄະນະບໍລິຫານງານສູນກາງຊາວໜຸ່ມ ກໍໄດ້ໃຫ້ກຽດເຂົ້າຮ່ວມພິທີເຊັ່ນດຽວກັນ. ໃນການກ່າວມີຄຳເຫັນຂອງທ່ານຮອງລັດຖະມົນຕີ, ທ່ານໄດ້ຊີ້ໃຫ້ເຫັນ ສາຍພົວພັນ ແລະ ການຮ່ວມມືທີ່ດີ ລະຫວ່າງ ອົງການສະຫະປະຊາຊາດ ແລະ ລັດຖະບານແຫ່ງ ສປປ ລາວ ໂດຍສະເພາະແມ່ນການປະກອບສ່ວນຂອງອົງການ ສປຊ ເຂົ້າໃນວຽກງານສ້າງພັດທະນາເສດຖະກິດ-ສັງຄົມ ຂອງ ສປປ ລາວ ໃນໄລຍະຜ່ານມາ, ພ້ອມນັ້ນ ກໍຍັງໄດ້ຍົກໃຫ້ເຫັນບົດບາດຂອງຊາວໜຸ່ມໃນການກຽມຄວາມພ້ອມຮັບມືກັບສະພາບ ແລະ ສິ່ງທ້າທາຍຕ່າງໆທີ່ ກຳລັງປະເຊີນຢູ່ໃນປະຈຸບັນ ຊຶ່ງບໍ່ພຽງແຕ່ເກີດຂຶ້ນໃນລະດັບພາຍໃນປະເທດເທົ່ານັ້ນ ແຕ່ຍັງລວມເຖິງໃນລະດັບສາກົນ. ຄວາມຮູ້ສຶກທີ່ຄ້າຍຄືກັນນີ້ ຍັງສະທ້ອນຢູ່ໃນບົດປະກອບຄຳເຫັນຂອງທ່ານຮອງເລຂາຄະນະບໍລິຫານງານສູນກາງຊາວໜຸ່ມ, ທ່ານ ອາລຸນໄຊ ສຸນນະລາດ, ກຳມະການສູນກາງສຳຮອງ, ເລຂາຄະນະບໍລິຫານງານສູນກາງຊາວໜຸ່ມ ປະຊາຊົນ ປະຕິວັດລາວ ເຊິ່ງມີເນື້ອໃນສຳຄັນ ວ່າ: “ຖ້າພວກເຮົາແຍກກັນຢູ່, ພວກເຮົາຈະບໍ່ສາມາດຊ່ວຍໂລກໄດ້ ແຕ່ໃນທາງກົງກັນຂ້າມ ຖ້າພວກເຮົາຮ່ວມມືກັນ, ພວກເຮົາກໍຈະສາມາດຊ່ວຍໂລກຂອງພວກເຮົາໄດ້,”.

IMG 5526 opt

ຊ່ຽວຊານຈາກສະຫະປະຊາຊາດ ແລະ ລັດຖະບານ ໃນເວທີສົນທະນາ ໄດ້ໃຫ້ຄຳແນະນໍາໄວໜຸ່ມກ່ຽວກັບຄໍາແນະນຳທີ່ງ່າຍດາຍກ່ຽວກັບການປະກອບສ່ວນໃນການປົກປັກຮັກສາສິ່ງແວດລ້ອມໂດຍຜ່ານການເລືອກຂອງຕົນເອງໃນແຕ່ລະມື້. ຮູບພາບ: UN Lao PDR

ໄວໜຸ່ມທີ່ເຂົ້າຮ່ວມງານໃນມື້ນີ້ມີແຜນການແນວໃດ ເພື່ອສ້າງອະນາຄົດທີ່ຍືນຍົງ? “ຂ້າພະເຈົ້າຈະໃຊ້ພລາສຕິກໜ້ອຍລົງ ແລະ ຂີ່ລົດຖີ່ຫຼາຍຂຶ້ນໃນອະນາຄົດ. ຂ້ອຍຈະບອກໝູ່ຂອງຂ້ອຍກ່ຽວກັບຄວາມສຳຄັນຂອງການຮັກໂລກ!”, ກ່າວໂດຍ ນ້ອງ ສຸດທິດາ ຫຼວງລາດ ຈາກໂຮງຮຽນ ມ. ປາຍ ໄຊເສດຖາ. “ຂ້ອຍຢາກໄປແຂວງທີ່ຫ່າງໄກສອກຫຼີກ ແລະ ພະຍາຍາມຊ່ວຍຄົນດ້ອຍໂອກາດຟູ່ທີ່ນັ້ນ. ພວກເຮົາຕ້ອງຊ່ວຍເຫຼືອເຊິ່ງກັນ ແລະ ກັນ”, ມີຄຳເຫັນໂດຍ ນ້ອງ ຄຳພົງ ແກ້ວວິພາກອນ.

ການປ່ຽນແປງຄວາມເຄີຍຊິນຂອງພວກເຮົາພຽງເລັກນ້ອຍກໍສາມາດສ້າງຜົນກະທົບມະຫາສານໄດ້. ສິ່ງທ້າທາຍຕົ້ນຕໍຂອງໂລກ ເຊັ່ນວ່າ ການປ່ຽນແປງດິນຟ້າອາກາດ, ມົນລະພິດທີ່ເປັນພລາສຕິກ ແລະ ພະຍາດລະບາດລະຫວ່າງປະເທດ ບໍ່ພຽງແຕ່ຖືກສົນທະນາໃນລະຫວ່າງກອງປະຊຸມຕ່າງໆຂອງຜູ້ນຳລະດັບໂລກເທົ່ານັ້ນ. ພວກເຮົາຍັງພົບພໍ້ສິ່ງເຫຼົ່ານີ້ ໃນຊີວິດປະຈຳວັນຂອງພວກເຮົານໍາອີກ. ສະນັ້ນ, ພວກເຮົາທຸກຄົນບໍ່ພຽງແຕ່ຮັບຜິດຊອບຕໍ່ອະນາຄົດຂອງພວກເຮົາເອງເທົ່ານັ້ນ, ແຕ່ຍັງຕ້ອງໄດ້ຮັບຜິດຊອບບາງສ່ວນຕໍ່ກັບອະນາຄົດຂອງປະເທດພວກເຮົາ ແລະ ອະນາຄົດຂອງໂລກອີກດ້ວຍ.

 

Sustainable Development Goals

SDG film Dee lead pic

Lao PDR then & now

Laos CountryStory

The Global Partnership for Effective Development Cooperation commends Lao PDR’s partnership mechanisms for more effective development co-operation.

Look at our photo stories

Exposure screenshot resized

Read our new brochure